मधेश समस्या सामाधान बारे युवाहरुले थाले अभियान

हुलाकी न्यूज, जनकपुरधाम २५ बैशाख । मधेशमा रहेका समस्या साधानका लागि युवाहरुले अभियान थालेका छन् ।

मधेशी युवाहरुकै नेतृत्वमा विभिन्न संघ–संगठनहरुले मधेशको समस्या समाधान गरी शान्ति स्थापनाका निम्ति सहकार्यसमेत गरेका छन् ।

अभियानको पहिलो कार्यक्रम जनकपुरधामबाट थालिएको छ । जनकपुरमा ‘समस्या समाधानका लागि मंथनः नयाँ चेताना र शान्तिका लागि यथास्थितिमा परिर्वतन’ विषयमा अन्तरक्रिया गरिएको छ ।

अन्तरक्रियामा सहभागि अधिकांशले मधेश समस्या समाधानका लागि एक्तावद्ध भई आन्दोलन गर्नु पर्नेको विकल्प नरहेको बताए ।

इन्स्टिच्यूट अफ पिस एण्ड जस्टिस् (आइपिजे), सानोपाइला र मधेशी युथ थिंक ट्यांकले मधेश आन्दोलनको उपलब्धी तथा अगामी आन्दोलनको सफलता बारे उक्त अन्तरक्रिया गरेको छ ।

आइपिजेकी निर्देशक डा.डि अकर र कार्यक्रम अधिकृत ड्यानियल ओर्थ तथा मधेशी युथ थिंक टैंकका बरिस्ट उपाध्यक्ष मोहम्मद रियाज साफी र सानोपाइलाका प्रमुख कार्यकारी अधिकृत कञ्चन झाले सहभागीहरुलाई आन्दोलनमा सफलताको लागि अपनाउनुपर्ने सतर्कताबारे जानकारी गराएका थिए ।

विभिन्न मुलुकमा द्वन्द्व व्यवस्थापन क्षेत्रमा सक्रिय आइपिजेले स्थानीय गैरसरकारी संस्था सानोपाइलाको सहकार्यमा मधेशमा जारी आन्दोलनको सही व्यवस्थापन गर्ने उदेश्यले कार्यक्रम आयोजना गरेको झाले बताइन् ।

कार्यक्रममा विभिन्न राजनीतिक दलका स्थानीय प्रतिनिधि, सञ्चारकर्मी, नागरिक समाजका अगुवा र युवा अभियन्तासमेत गरी २० जना सहभागी रहेको थिंक टैंकका रियाज साफीले जनाए । उनीहरुले विगतको मधेश आन्दोलनबाट प्राप्त गरेको उपलब्धीलाई पहिचान गरी उदेश्य पुरा गर्न कसरी योजनाबद्ध तरिकाले अगाडी बढ्न सकिन्छ, त्यो बुझाउन यो कार्यक्रम आयोजना गरिएको झाले प्रष्ट्याए ।

कार्यक्रमका सहभागीहरुले संविधानमा संशोधन, समानुपातिक समावेशीको सिद्धान्तलाई वैज्ञानिक तरिकाले सम्बोधन, राज्यको हरेक निकायमा जनसंख्याको आधारमा मधेशको समान प्रतिनिधित्व कायम र मधेशको विकासमा राष्ट्रिय बजेट न्यायोचित रुपमा विनियोजन गरिनुपर्ने माग राखेका थिए ।

यसका लागि समग्र मधेशका जनता एक जुट भएर राज्यविरुद्ध चरणबद्ध आन्दोलनमा होमिने तयारीमा रहेको उनीहरुको भनाई थियो ।
यसपछि पनि यस अभियानलाई निरन्तरता दिन अन्य जिल्लाहरुमा पनि कार्यक्रम गरिने साफीले बताए ।