हुलाकी न्यूज, काठमाडौं १८ बैशाख । प्रधानमन्त्री केपीशर्मा ओलीले शनिवार बोलाएको सर्वदलीय बैठक मधेशकेन्द्रित दलले बहिष्कार गरेका छन् ।
यथास्थितिमा बैठकमा सहभागी हुनुको कुनै औचित्य नै नभएकाले हामी उपस्थित नभएको मधेशकेन्द्रित दलका नेताहरूले बताएका हुन् ।
यसअघि, शुक्रवार प्रधानमन्त्री ओलीले विराटनगरमा सञ्चारकर्मीसँग कुरा गर्दै महन्त ठाकुरबाहेक अन्य मधेशकेन्द्रित दलका नेता तथा प्रतिनिधि सर्वदलीय बैठकमा सहभागी हुने जनाएका थिए ।
यसैबीच, मधेशकेन्द्रित दलको सहभागिताबिना बसेको सर्वदलीय बैठकमा समसामयिक विषयमा सामान्य छलफल भएको छ । प्रधानमन्त्री कार्यालय सिंहदरबारमा बसेको बैठकमा मधेश समस्या, भूकम्पपछिको पुनर्निर्माण र बजेट अधिवेशनबारे सामान्य छलफल भएको हो । बैठकमा प्रधानमन्त्री ओलीले तीन वटा प्रस्ताव राखेका थिए ।
प्रधानमन्त्री ओलीले मधेशमा देखिएको समस्यालाई राष्ट्रिय मुद्दाको रूपमा लिई वार्ता, जेठको पहिलो सातामा पुनर्निर्माणका लागि स्वयंसेवक परिचालन र संसद् अधिवेशनमा नीति तथा कार्यक्रम तथा बजेटपूर्वको छलफल सुरु गरिनुपर्ने प्रस्ताव गरेका थिए ।
प्रतिउत्तरमा नेपाली कांग्रेसका सभापति शेरबहादुर देउवाले मधेश समस्या सरकारकै कारण समाधान हुन नसकेको आरोप लगाएका थिए । उनले सरकारी वार्ता टोलीप्रति आन्दोलनरत पक्षको विश्वास नदेखिएकाले पुरानै वार्ता टोलीलाई कायम राख्ने वा नयाँ बनाउनेबारे पुनर्विचार गर्नुपर्ने धारणा राखेका थिए ।
प्रधानमन्त्रीले बोलाएको बैठकमा मधेशकेन्द्रित दलबाहेक संसद्मा प्रतिनिधित्व गर्ने अधिकांश दलको सहभागिता थियो ।
