सीके राउतको विवादित अन्तर्वार्ता(भिडियोसहित)

स्वतन्त्र मधेश गठबन्धनका संयोजक डा.सीके राउतको अन्तर्वार्ता काठमाडौंबाट सञ्चालित एबीसी टेलिभिजनले प्रशारण गरेपछि टेलिभिजन नै विवादमा तानिएको छ ।

प्रेस काउन्सिल नेपालले यस अन्तर्वार्तालाई पत्रकार आचार संहित विपरीत भनेको छ । तर अन्तर्वार्ता गर्ने पत्रकारले पत्रकारिताको धर्म निर्वाह मात्र गरेको दाबी गरेका छन् ।

प्रेस काउन्सिलले तीन दिनभित्र टेलिभिजनसँग कारवाही किन नगर्ने भन्ने बारे जवाफ मागेको छ ।

अन्तर्वार्ताकार सुशील पाण्डेले भनेका छन्,‘सञ्चार माध्यम लोकतन्त्रमा तेश्रो आँखाको भूमिकामा रहन्छ । रहेक व्यक्ति वा समूहका विचारलाई आलोचनात्मक कोणबाट जनतामा राख्ने काम हाम्रो हो । सीकेको अभियानलाई सहयोग गर्ने नियमत न मेरो संस्था को हो न मेरो नै । राज्यलाई सिके राउत विखण्डनकारी लाग्छ भने कानूनी कारबाही गरे हुन्छ । जब उनी मधेसबाट राजधानी आएको एक साताभन्दा बढी भइसकेको छ । खुलेआम गतिविधि गरिरहेका छन् । मेरो स्टुडियोमा आएर अन्तर्वार्ता दिएर गए । प्रहरीले पक्राउ गरेर जेल हाले भयो । तर, हामीले स्वतन्त्र र निस्पक्ष रुपमा गरेको कामलाई लिएर मेरो संस्था र मेरो व्यसायिक धर्ममा औंला उठाउने काम हुँदा दुःख लागेको छ ।’

यता टेलिभिजनले अफिसियल रुपमा आफ्नो बेबसाईटबाट अन्तर्वार्ता बारे प्रष्ट पारेको छ ।

एबीसी न्यूज राष्ट्रियताप्रति प्रतिवद्ध छ

बुधबार साँझ कार्यक्रम एबीसी वाचमा सीके राउतको अन्तर्वार्ता प्रसारित भएपछि यसबारे क्रिया प्रतिक्रियाहरु आउन थालेका छन् । राउतको अन्तर्वार्ता प्रकरणप्रति एबीसी फरक मत राख्दछ ।

एबीसी न्यूज स्थापनाकालदेखि राष्ट्र, राष्ट्रियता र जनताप्रति सबैभन्दा बढी समर्पित छ । गणतन्त्र नेपालको पहिलो न्यूज च्यानलको रुपमा हामीले स्थापनाकालदेखि आम जनताको चासो र चिन्ताको पक्षमा समाचारहरु प्रसारित गर्दैआएका छौं । हामी दावीका साथ भन्छौं, हाम्रो, हाम्रा प्रत्येक समाचार र रिपोर्टहरु जनताप्रति उत्तरदायी छन्, राष्ट्रियताप्रति प्रतिवद्ध छन् । जनताका प्रत्येक सरोकारमा चासो राख्नु हाम्रो दायित्व हो ।

एबीसीमा बुधबार लाइभ अन्तर्वार्ता प्रसारित भएपछि बुधबार रातिदेखि नै क्रिया प्रतिक्रियाहरु आइरहेका छन् । ती सबैको एबीसी सम्मान गर्दछ । सिके राउतका कुनै पनि अभिव्यत्ति एबीसी टेलिभिजनको सम्पादकीय नीतिसंग मेल खांदैनन् । बरु, ती अभिव्यत्तिप्रति एबीसी टेलिभिजन खेद व्यक्त गर्दछ । तर, सीके राउतले प्रत्यक्ष प्रसारणका क्रममा भनेका कुराहरुलाई लिएर अहिले बाहिर आइरहेका क्रिया प्रक्रियाहरुप्रति भने हामी संवेदनशील भएका छौं ।  सीके राउतका अभिव्यत्तिबारे व्याख्या र विश्लेषण गर्ने आम जनताले हो । उनका अभिव्यत्तिले एबीसीको प्रतिनिधित्व गर्दैनन् । प्रत्यक्ष प्रसारणमा गरिएका कुराकानीलाई सेन्सर हुँदैन भन्ने सबैलाई जानकारी भएकै हो । बरु, अन्तर्वार्ताकारले उनका अभिव्यक्तिप्रति बारम्बार आपत्ति जनाएका छन् ।

एबीसीमा प्रसारित अन्तर्वाताले सीके राउतलाई कतै प्रमोट गरेको छैन । बरु, उनको चरमपन्थी अभिव्यक्तिप्रति आम जनताले जान्न पाएका छन् र उनी कस्तो खाले व्यक्ति हुन भन्ने बुझ्न पाएका छन् ।

सीके राउतले राष्ट्र विखण्डन गर्ने पहिलो अभिव्यक्ति एबीसीबाट दिएका पनि हैनन् ? पहिल्यै दिएका थिए भने उनलाई अहिलेसम्म कारवाही गरिसकेको हुनुपथ्र्यो । हामीलाई अहिलेसम्म थाहा भएअनुसार सिके राउत राज्यबाट आतंककारी घोषित व्यक्ति हैनन् । यदि आतंकारी भएको भए राज्यले खुलम खुला हिंडडुल गर्न छुट किन दिएको ? सिके राउतलाई नेपाल प्रहरीले नत सर्वाधिक खोजीको सूचिमा राखेको छ नत इन्टरपोलमा रेडकर्नर नोटिस जारी गरेको छ ? देशको कानुन व्याख्या गर्ने सर्वोच्च सम्मानित निकाय अदालते सिके राउतलाई कारवाही गर्न र जेलमा पठाउन अहिलेसम्म आदेश जारी गरेको छैन ।

एबीसीमा प्रसारित सिके राउतको अभिव्यक्तिकै कारण आम जनताको राष्ट्रियताप्रतिको मनोविज्ञानमा गम्भीर चोट पुगेको छ भने एबीसी न्यूज त्यसमा क्षमायाचना गर्न तयार छ । तर, यही नाममा एबीसी विरुद्ध प्रयोग हुने तत्वहरुहरुप्रति भने एबीसी खेद प्रकट गर्दछ । राष्ट्रियता र सार्वभौमिकताप्रति सबैभन्दा बढी सचेत एबीसी छ । राष्ट्रियता र देशभक्तिप्रतिको हाम्रो निरन्तरको अडान कसैकसैलाई पाच्य हुन नसकेको पनि प्रष्टै छ । सीके राउतको अन्तर्वार्ताका क्रममा उनले दिएका अभिव्यक्तिप्रति एबीसीले प्रष्ट फरक मत राख्छ । तर, यही नाममा एबीसीप्रति गरिने आक्रमण भने स्वीकार हुन सक्दैन । एबीसी प्रत्येक मैत्रिपूर्ण आलोचनालाई स्वीकार गर्न, दर्शकको सुझाव अनुसार सुधार गर्न तयार छ, तर, ध्वंसात्मक आलोचनालाई भने एबीसी कतै स्वीकार गर्न बाध्य छैन । गाउँ सहर दुनियाँ ब्यूँझाउने हाम्रो अभियान जारी छ । http://abctvlive.com/?p=43991

भिडियो श्रोत : एबीसी टिभीको युटुव च्यानलबाट डाउनलोड गरिएको हो । भिडियोको सम्पूर्ण अधिकार सोही टेलिभिजनको रहेको छ ।