जनकपुरधाम । अबको सात महिनापछि केपी शर्मा ओली नेतृत्वको नेकपा (एमाले) भत्किने नेकपा (एकीकृत समाजवादी)की केन्द्रीय सदस्य नेतृ रामकुमारी झाँक्रीलेदावी गरेकी छन्।

समाजवादी प्रेस संगठनले जनकपुरधाममा आयोजना गरेको पत्रकार सम्मेलनमा नेतृ झाँक्रीले प्रतिनिधिसभा र प्रदेशसभाको निर्वाचनमा एमाले भत्किएर जाने जिकिर गरिन्।

उनले ओली सच्चिने कुनै सम्भावना नरहेको दावी गर्दै निर्वाचन अघि ओलीलाई आफ्ना सयौँ नेता कार्यकताहरूले साथ छाड्ने बताइन्।

उनले ओलीतर्फ लागेकाहरु तिर इंकित गर्दै भनिन्, ‘कुनै चिज बिग्रेपछि काम लाग्दैन, ओली सच्चिने कुनै सम्भावना छैन। त्यसकारण कुनै सम्भावना नै नभएको घरमा बस्नु भन्दा समयमै त्यहाँबाट छोडेर यो आन्दोलनमा समाहित हुनु सबैका लागि हितकर हुनेछ।’

एमालेलाई ‘ओली कम्पनी’ भन्दै सम्बोधन गरेकी झाँक्रीले अबको सात महिनासम्म सुस्त गतिमा एमाले भत्किने, ८ महिनापछि संघ र प्रदेशको निर्वाचनको प्रक्रिया शुरु हुने र त्यसपछि सामान्य विद्रोह नभई ओली कम्पनीमा पहिरो नै जाने ठोकुवा गरिन्। संगठन निर्माणको क्रममा विद्रोहको प्रक्रियालाई संगठित गर्ने अभियान चलेको बताउँदै उनले सयौँ नेताहरू एकीकृत समाजवादी पार्टीमा आउन चाहिरहेको जिकिर समेत गरिन्।

एमालेको नेतृत्वमा अवसरवाद, व्यक्तिवाद, नातावाद, विसर्जनवाद, दक्षिणपन्थी हावी भई पार्टी सच्चिनै नसक्ने अवस्थामा गएपछि आफूहरुले विद्रोह गरेको नेतृ झाँक्रीले बताइन्। दुई तिहाई बहुमतको तत्कालिन सरकारलाई सोही ढंगले सञ्चालन गर्न नसकेर त्यसको बदलामा मध्यावधि निर्वाचनको माग गर्दै दुई दुई पटक संसद् विघटन गर्ने जस्तो गैरजिम्मेवार, असंवैधानिक र अपराध गर्ने ओलीले काम गरेको उनले आरोप लगाइन्।

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.