आन्दोलन छापामार युद्धतिर जान सक्छःअध्यक्ष महाविर चौधरी(अन्तरवार्ता)

विश्वभरी छरिएर रहेका थारुहरुको छाता संगठन हो ‘थारु अराउण्ड द वल्र्ड’ जसको नेतृत्व गर्दैछन् महाविर चौधरी । दाङ्गको तुल्सीपुरमा जन्मेका चौधरी हाल अमेरिकामा बस्दै आएका छन् तर मधेश–थरुहटमा आन्दोलन सुरु भएदेखि उनी यसै क्षेत्रमा छन् । मंसिर १८, १९ र २० गते दाङ्ग मै थारु युवाहरुको राष्ट्रिय भेला गराउँदैछन् । जारी आन्दोलन र यसका निकासका विषयमा हुलाकी न्यूजका लागि सम्पादक बीपी साहले ‘थारु अराउण्ड द वल्र्ड’का अध्यक्ष महाबिर चौधरीसँग गरेको कुराकानीको सम्पादित अंश ।
मधेश–थरुहटमा जारी आन्दोलनलाई तपाईहरुले कसरी बुझ्नु भएको छ ?

मधेश–थरुहटमा एक सय १५ दिनदेखि जारी आन्दोलन अधिकारको लडाई हो । जसलाई राज्यले बुझ्न सकेको छैन वा बुझेर पनि पेलेर जाने मानसिकतामा छ । आन्दोलनको माग सबैलाई थाहा छ, मैले एक वाक्यमा भन्नु पर्दा हामी दासत्वबाट मुक्ति चाहन्छौं र आफ्नो अधिकारको सुनिश्चितता चाहन्छौं ।

अनि राज्यलाई कसरी बुझ्नु भएको छ ?

राज्यले मधेश–थरुहटका जनतालाई आफ्नो नागरिक ठान्दैन । राज्यले मधेशी–थारुलाई पराई ठान्छन् र त्यस्तै व्यवहार गर्दैछ । राज्यले पहाडका एक थरी उच्च वर्गका जातीलाई मात्र आफ्नो ठान्छन् र उसकै नियन्त्रणमा छ । भन्ने बेलामा सयौं थुँगा फूलका हामी भन्छन् तर मधेशी–थारुको फूल कहिले पनि फुल्न दिएको छैन ।

अनि आन्दोलनमा राज्यका सुरक्षा निकायहरुको व्यवहार कस्तो हेर्दै हुनुहुन्छ ?

सुरक्षा निकायहरु मधेशी–थारुमाथि क्रुर भएर प्रस्तुत भएका छन् । आफ्नै जनतामाथि यसरी प्रस्तुत हुन्छ भन्ने लागेको थिएन । राज्यले आफ्नै जनतामाथि सेना परिचालन गर्यो । यो कतिको जायज कुरा हो । प्रष्टरुपमा भन्दा थारुलाई दबाउन सेना परिचालन भएको हो ।

वर्षौंदेखि हामी कमैया, कमलरी र भूमिहिन बनिरहँदा राष्ट्रवादी भन्थे तर आज अधिकार माग्दा हामीलाई आतंकबादी भन्दैछन् गोली ठोक्दैछन् ।

अहिले जारी आन्दोलनको उपलब्धी पनि केही हेर्नु हुन्छ ?

केही घटनाहरु दुखद छन् तर समग्रमा धेरै उपलब्धीहरु भएको छ । यस आन्दोलनले हामी सशक्त भएका छौं । हामी एकीकृत भएका छौं । हाम्रा अधिकारका कुरा गाउँ गाउँसम्म पुगेको छ । गाउँ गाउँका जनता हाम्रा अधिकारका विषयमा सचेत भएका छन् । दिन प्रतिदिन हाम्रा अधिकारका कुरा र मागहरु प्रसार हुँदैछ । राज्यले आन्दोलनका मागलाई पुरा नगरेसम्म हाम्रा मागहरु जनताले प्रष्टरुपमा बुझ्नेछ र राज्यप्रति झनै आक्रोसित हुनेछ ।

आन्दोलनमा मधेशी–थारुको सहकार्यलाई कसरी लिनु भएको छ ?

पहिलो र दोस्रो मधेश आन्दोलनमा हामी मधेशी–थारु एकै ठाउँमा थियौं । माओवादी अध्यक्ष प्रचण्डलाई मधेशमा झट्का लागेपछि उनले मधेशी–थारुलाई विभाजनको प्रयास गरे । एमाले, कांग्रेसले पनि मधेशी–थारुबीच विभाजन ल्याए । केही दिन मधेशी–थारुबीच विभाजित जस्तै देखियो तर वास्तवमा त्यस्तै रैनछ । अहिले यो आन्दोलनले हामी मधेशी–थारु झन् घनिष्ठ भएका छौं । राज्यले दिएको घाउले हामीबीचको मनमुटाब सकिएर घनिष्ठतामा परिवर्तन भएको छ । हामी पहिलेभन्दा पनि शक्तिशाली र मजबुत भएका छौं ।

टिकापुर घटनालाई कसरी लिनु हुन्छ ?

टिकापुर घटनामा जे भयो त्योप्रति म निकै दुखित छु । ७ गतेको घटनालाई राजनीतिक रुपले समाधान गर्नुपर्छ । जुन ८ गते घटना भयो, त्यो सुरक्षा निकायकै निगरानीमा भयो । त्यो अक्षम्य छ । कफ्र्यूको समयमा थारुहरुको घर जलाईयो, लुटियो ।
७ गतेको घटनाको आरोपमा थारुहरुलाई पक्राउ गरिएको छ । यातना दिइएको छ तर ८ गतेको घटनाका दोषीहरुका विरुद्ध किटानी जाहेरी पनि लिइएको छैन । थारुहरुले हुलाकमार्फत जाहेरी दिएको हो ।

अब यो आन्दोलनको व्यवस्थापन कसरी हेर्नु भएको छ ?

वर्तमान आन्दोलनलाई सरकार पक्षबाट बढावा दिइएको छ । राज्यले अहिलेसम्म पनि मधेशी थारुको आवाज सुनेको छैन । देश विकराल समस्यामा फँसिरहेको देख्छु ।

मधेश थरुहटको आन्दोलन छापामार युद्धतिर जानसक्ने मैले देख्दैछु । थारुहरु त्यसतर्फ अग्रसर भएका छन् भने पूर्वकाहरु स्वतन्त्र मधेशको कुरा उठाउँदैछ । तर त्यो अवस्था आईसकेको छैन ।