हुलाकी न्यूज , जनकपुरधाम : धनुषाको औरही गाउँपालिका–६, पोखरभिंडाकी एक १६ वर्षीया किशोरी स्थानीय रवीन्द्र मण्डलसँग प्रेममा परिन् । दुई वर्षसम्म उनीहरूको प्रेम खुसीमय बित्यो ।

“एकार्कालाई खुबै माया गर्थ्योँ, विश्वास गर्थ्यौँ । हामीले प्रेममा परेको तीन महिनामै सँगै जीवन बिताउने वाचा गर्‍यौँ । एकार्कासँगै विवाह गर्ने कसम पनि खायौँ,” किशोरीले विगत सम्झँदै भनिन् ।

मण्डलले शारीरिक सम्बन्ध राख्न किशोरीसमक्ष पटक–पटक प्रस्ताव राखेको उनी बताउँछिन् । तर, विवाह बन्धनमा बाँधिएपछि मात्रै शारीरिक सम्बन्ध बनाउने आफूले अडान लिएको उनको भनाइ छ ।

केही महिनापछि मण्डलले आफूलाई माया नगरेको तर्क गर्दै पुनः शारीरिक सम्बन्ध राख्न जिद्दी गरेको किशोरीले बताइन् । “आफ्नै प्रेमीलाई विश्वास दिलाउन हामीले शारीरिक सम्बन्ध राख्यौँ,” उनले भनिन्, “त्यो निर्णयले मेरो जीवन र प्रेम बर्बादतर्फ धकेलियो ।”

किशोरी गर्भवती भएको चार महिनापछि प्रेमी मण्डलले जानकारी पाए । मण्डल सात महिनायता फरार छन् ।

न्यायको लागि गुहार मागेपछि गाउँमा दुईपटक पञ्चहरूको बैठक बस्यो । ती किशोरीकी आमाले भनिन्, “गाउँको पञ्चले मेरो छोरीको इज्जत जोगाउन कुनै प्रकारको निर्णय गरेनन् । विवाहको कुरा गर्नुपर्थ्यो, त्यो पनि गरेनन् । पञ्चहरूले पाँच लाख रुपैयाँ लिएर बच्चा फालिदिन सुझाएको थियो । तर, हामीले मानेनौँ ।”

जिल्ला प्रहरी कार्यालय धनुषाअन्तर्गतको महिला सेलमा पीडितले विवाह गराइदिन निवेदन समेत दिइन् । तर, कतैबाट न्याय नपाएको किशोरीको गुनासो छ ।

गएको साउन ८ गते जनकपुरधामस्थित विदेह अस्पतालमा उनले छोरीलाई जन्म दिइन् । किशोरीकी आमाका अनुसार शल्यक्रिया गरी बच्चा जन्मिएको हो ।

किशोरीका बुवाको तीन वर्षअघि निधन भएको थियो । घरमा न्यायको लागि पहल गर्ने कोही छैन । आम्दानीको कुनै स्रोत पनि छैन ।

“छोरीको डेलिभरी गराउन ३६ प्रतिशत ब्याजदरमा ऋण लिएको छु । घरमा कुनै आम्दानी पनि छैन,” उनले भनिन्, “अब हामी कसरी बाँच्ने ?” डेलिभरी गराउन ६० हजार रुपैयाँ खर्च भएको उनले बताइन् ।

न्यायको लागि उनले स्थानीय नेतासँग पनि अनुनय गरिन् । तर, किशोरीका प्रेमी मण्डलको विरुद्धमा गाउँमा कसैले पनि बोल्न नमानेको उनको भनाइ छ । आर्थिक अवस्था निकै कमजोर रहेकी उनका पाँच छोरी छन् । दुई छोरीको विवाह भइसकेको छ ।

यता, धनुषाका प्रहरी नायब उपरीक्षक जितेन्द्र बस्नेतले उजुरी गरिएपछि प्रक्रिया अगाडि बढ्ने बताए । उजुरी गरिएपछि मेडिकल उपचारपश्चात् प्रमाणित भए सँगै बस्ने वातावरण प्रहरीले मिलाउने उनको भनाइ छ ।

हाडनाता प्रमाणित गराउन उनले पीडितलाई सुझाए । घटनाबारे अनविज्ञता प्रकट गर्दै उनले स्थानीय प्रहरीसँग बुझ्ने बताए ।

LEAVE A REPLY

Please enter your comment!
Please enter your name here

This site uses Akismet to reduce spam. Learn how your comment data is processed.