मधेशका पाँच जिल्ला टुक्राउने पक्षमा मधेशी मोर्चा (समाचार विश्लेषण)

हुलाकी न्यूज/काठमाडौं

पछिल्लो समय एमाओवादी अध्यक्ष प्रचण्ड पुनः मधेशी नेताहरुसँग नजिकिदैछ भने मोर्चाका नेताहरु पनि प्रचण्डसँग टाँसिदै गएका छन् । प्रचण्डले मोर्चाका नेताहरुसँग बारम्बार अनौपचारिक तथा गोप्य छलफलमा जुटेका छन् र मोर्चाका नेताहरुलाई फकाउन सफल भएका छन् ।

हाल प्रचण्डले देखाएको मध्यमार्गी बाटो अर्थात मधेशका पाँच जिल्लालाई टुक्रियाएर पहाडमा गाभ्ने विषयमा मोर्चाका नेताहरु लगभग सहमतिमा पुगेका छन् ।

पहाडबाट बसाईसराई गरी मधेशको जंगल फडानी गरेर बसेका तथा पूर्वपश्चिम राजमार्गमा सरकारबाट बसाइएका स्थानहरुलाई मधेशबाट टुक्रियाएर पहाडमा गाभ्ने मनसायमा मोर्चाका नेताहरु पुगेका हुन् ।

ओलीले फालेको जालमा मोर्चाका शिर्षस्त नेताहरु फँस्दैगएको आरोप मधेशी नेताहरुले नै लगाउन थालेका छन् ।

पछिल्लो सातादेखि मोर्चाका नेताहरु आफ्नै अडानबाट पछि हटेको बुझिन्छ ।

सिमांकनको सवालमा आयोगले बुझाएको बहुमतको प्रतिवेदनलाई बटमलाईन बनाएको मोर्चा अहिले मधेशका जिल्ला टुक्रयाएर पहाडमा गाभ्ने विषयमा सहमति नजिक पुगेका छन् ।

अब मधेशी नेतालाई ‘प्यार’ गर्दै प्रचण्ड

कुनै बेला मधेशसँग लभ परेको भन्ने प्रचण्ड आन्दोलनताका मधेशबाटै लखेटिएपछि अब मधेशी नेताहरुसँग मात्रै प्यार गर्न थालेका छन् ।

मधेशका विषयमा केपी ओलीकै शैलीमा भाषण ठोके पनि मधेशी नेताहरुसँगको छलफलमा नरम बनेका छन् । पछिल्लो केही सातादेखि प्रचण्ड अचानक मधेशतिर मोडिएको हो ।

अर्कोतर्फ संघीय समाजवादी फोरम नेपालका अध्यक्ष उपेन्द्र यादव एमाओवादीबाट बाहिरिएका डा.बाबुराम भट्टराईसँग नजिकिदै गर्दा प्रचण्डले पनि यादवसहित मोर्चाका नेताहरुसँग निकटता देखाउन थालेका हुन् ।

मधेशी मोर्चाका नेताहरुसँग प्रचण्डले गरेका पछिल्लो गोप्य वार्ताहरुमा प्रचण्डले वर्तमान सरकार ढाल्नेदेखि काँग्रेसले समर्थन गरेको खण्डमा मधेशी कै नेतृत्वमा सरकार बनाउने सम्मको आश्वान बाँड्न थालेका छन् ।

छलफलमा सहभागी मध्येका मोर्चाका नेताहरु भन्छन्,‘प्रचण्ड अचानक मधेशतिर पुनः मोडिएका छन् । र, छलफलमा भारतीय पक्षबाट निकै त्रसित भएको देखिन्छन् । एमालेलाई श्राप्ने काम पनि सुरु गरिसकेका छन् ।’

मोर्चा र प्रचण्डबीच मंगलबार भएको गोप्य छलफलमा प्रचण्डले मधेशको जिल्ला टुक्रियाएर पहाडमा गाभ्ने उपाय सबभन्दा उपयुक्त रहेको बताउँदै मोर्चाका नेताहरुलाई फकाउन सफल भएको हो । अन्य विषयमा काँग्रेसले उठाएको संसोधनका कुरा सही भएको ठम्याइ पनि मोर्चाका नेताहरुको रहेको छ ।

मधेशमा जारी आन्दोलनलाई विश्राम दिन काठमाडौंमा घनिभूतरुपमा मोर्चाका केही नेताहरु सक्रिय छन् । मोर्चाका नेताहरुसँग कुरा गर्दा अव जतिसक्दो चाँडो आन्दोलनलाई निश्चित विन्दुमा प¥याएर स्थगन गर्ने मनसायमा पुगेका छन् ।