रमेश ठाकुर, रौतहट, ६ मंसिर । रौतहटको धर्मपुर गाविसमा एक युवकले आफ्नै आमा र बहिनीको हत्या गरेका छन् । आईतबार युवकले कोदालोले काटेर आमा र बहिनीको हत्या गरेका हुन् ।
धर्मपुर गाविस वडा नम्बर ९ पकाहा टोलका भजन राय यादवका २० वर्षीय छोरा नन्दकिशोर यादवले ३७ वर्षीया आमा रामकली देवी र १२ वर्षीया बहिनी अनिता यादवलाई कोदालोले काटेर हत्या गरेका हुन् ।
बैलगाडामा बसेर बागमती किनारमा रहेको खेतमा बदाम खन्नका लागि जाँदै गरेको बेला नन्दकिशोरले कोदालोले घाँटिमा प्रहार गरी हत्या गरेको इलाका प्रहरी कार्यालय गरुडाले जनाएको छ । प्रहरीको प्रारम्भिक अनुसन्धानमा नन्दकिशोरको मानसिक अवस्था ठिक नरहेको देखाएपनि घटना पश्चात उनि फरार रहेकाले घटनाको वास्तविक कारण पत्ता लाग्न नसकेको प्रहरी नायब उपरिक्षक राजेन्द्र पोखरेलले बताएका छन् ।
हत्या पश्चात फरार रहेको नन्दकिशोरको खोजिकार्य तिव्र रुपमा भइरहेको जिल्ला प्रहरी कार्यालय रौतहटले जनाएको छ ।
