सरकारलाई एन्टिबायोटिकको डोज पुगेको छैन : त्रिपाठी

हुलाकी न्यूज, काठमाडौं, १२ कार्तिक । तराई मधेश लोकतान्त्रिक पार्टीका वरिष्ठ उपाध्यक्ष हृदयेश त्रिपाठीले सरकारले मधेश आन्दोलनलाई सम्बोधन गर्नुसाटो इन्धनको विकल्प मात्र खोज्नु दुखद रहेको बताएका छन् । उनले सरकारले जारी आन्दोलनको राजनीतिक समाधान गर्नुसाटो पेट्रोलियम पदार्थको विकल्प खोज्नुले देशमा संकट झनै बढ्ने बताएका छन् ।

हुलाकी न्यूजसँग कुरा गर्दै त्रिपाठीले मधेश आन्दोलनलाई राजनीतिक रुपले सम्बोधन नगरेसम्म कुनैपनि विकल्प काम नलाग्ने बताए । सरकारले मधेश आन्दोलनलाई बेवास्ता गरिरहेको आरोप लगाउँदै आन्दोलनलाई झनै विस्तार गर्ने बताएका छन् । त्रिपाठीले भने, “सरकारलाई एन्टिबायोटिकको डोज पुगेको छैन, डोज अझै थप्नुपर्छ ।”

देशमा अहिले बनेको राजनीतिक समिकरण प्रतिगमनकारी र परिवर्तनविरोधी रहेको उनको दाबी छ । देशमा अहिले राष्ट्रप्रमुख, सरकारप्रमुख, सत्ता साझेदार दलहरु सबै मधेशविरोधी रहेको भन्दै उनले यो राजनीतिक समिकरणले मधेश आन्दोलनलाई सम्बोधन गर्ने र मधेशीको अधिकार सुनिश्चित गर्नेमा विश्वस्त नरहेको बताएका छन् ।

त्रिपाठीले अढाई महिनाभन्दा लामो समयसम्म आन्दोलन जारी रहँदा र नाकाबन्दीले चरम अभाव सिर्जना भइसक्दा पनि सरकारले मधेश आन्दोलनलाई गम्भीरतापूर्वक नलिएको भन्दै मुलुक अब द्वन्द्वमा फस्ने जिकिर गरे । उनले जारी आन्दोलन कुनै पनि हालतमा नरोकिने र झनै सशक्त तथा कडा बनाउने बताए ।

नेता त्रिपाठीले सरकारी वार्ता टोली पनि वार्ताका लागि गम्भीर नरहेको आरोप लगाए । उनले बिहिबारको वार्तामा पनि सरकारी टोलीले प्रदेशको सीमांकनका विषयमा ठोस एजेण्डा नल्याए आफुहरु वार्ताको लागि पुनर्विचार गर्न बाध्य हुने बताएका छन् । नेता त्रिपाठीले भने, “सरकारको रवैया यस्तै रहने हो भने हामीले धेरै कुरामा पुनर्विचार गर्नुपर्छ ।”