हुलाकी न्यूज, काठमाडौं, २८ आश्विन । जारी मधेश आन्दोलनमा ऐक्यबद्धता जनाउँदै मधेशी दलित समुदायले विभिन्न ठाउँमा प्रदर्शन गरेका छन् । बिहिबार बारा र पर्साका धानुक समुदायले विरोध जुलुस निकालेका छन् ।
वीरगंजमा विभिन्न प्लेकार्ड बोकेर धानुक समुदायले विशाल जुलुस निकालेको छ । उनीहरुले मधेशीको माग पुरा गर, प्रहरी दमन बन्द गर, माग पुरा भएपछि नाका खुल्छ लगायतका नारा लेखिएका प्लेकार्ड बोकेका थिए ।
यसअघि जनकपुरमा पनि बुधबार धानुक समाजले मधेश आन्दोलनमा ऐक्यबद्धता जनाउँदै जुलुस निकालेको थियो । धानुक समुदायको पहिचान धनुषसहित जनकपुरमा जुलुस निकालिएको थियो ।
जनकपुरमा जुलुस निकाल्नु अघि उनीहरुले मधेश आन्दोलनमा मधेशी दलितका माग पनि अघि सारिएको भन्दै आन्दोलनको स्वागत र समर्थन गरेको बताएका थिए ।
