हुलाकी न्यूज, काठमाडौं । प्रतिनिधि सभाको निर्वाचनमा प्रत्यक्षतर्फ सबभन्दा बढी मत दुई नम्बर प्रदेशमा बदर भएको छ । दुई नम्बर प्रदेशमा करिब ९ प्रतिशत मत बदर भएको निर्वाचन आयोगले जनाएको छ ।
मधेशका जिल्लामा डा.सीके राउत नेतृत्वको स्वतन्त्र मधेश गठबन्धनले मत बदर अभियानसमेत चलाएको थियो । जसकारण बदर मतको प्रतिशत बढी भएको अनुमान गरिएको छ ।
प्रमुख निर्वाचन आयुक्त डा.अयोधीप्रसाद यादवले हिमाली जिल्लाको तुलनामा मध्य मधेशका जिल्लामा बदर मत प्रतिशत निकै बढी रहेको जानकारी दिए ।
प्रमुख यादवका अनुसार सबैभन्दा कम मनाङमा शुन्य दशमलव ३७ प्रतिशत मत बदर भएको छ भने सबैभन्दा बढी २ नं प्रदेशका जिल्लामा झण्डै नौ प्रतिशतसम्म मत बदर भएको छ ।
प्रतिनिधिसभाको प्रत्यक्ष निर्वाचनमा मुलुकभर औषतमा पाँच दशमलव १८ प्रतिशत मत बदर भएको आयोगको तथ्यांक रहेको छ ।
स्थानीय निकायको निर्वाचनमासमेत स्वतन्त्र मधेश गठबन्धनले कोठली बाहर मतदान अभियान चलाएको थियो ।
जसकारण मधेशका जिल्लाहरुमा बदर मतको संख्या बढी रहेको थियो । अहिले पनि डा.राउतको अभियानका कारण बदर मतको संख्या बढी रहेको आंकलन गरिएको छ ।
