हुलाकी न्यूज, जलेश्वर । महोत्तरी जिल्लाको सदरमुकाम जलेश्वरमा बाढीका कारण महामारी फैलिने खतरा बढेको छ । जलेश्वरनगरपालिका वडा नम्बर आठमा रहेको साह पोलट्री फर्ममा मरेको कुखुराहरुले दुर्गन्ध फैलाउँदा महामारी फैलिने खतरा बढेको स्थानीय चिकित्सकहरुले बताएका छन् ।
स्थानीयबासी रोहित चौधरीले हुलाकी न्यूजलाई दिएको जानकारीअनुसार बाढीका कारण फार्म मै मरेका कुखुराहरु अहिलेसम्म फालिएको छैन । जसकारण दुर्गन्ध निकै फैलिएको छ ।
चौधरीका अनुसार स्थानीयबासीहरुले सीडीयोसहित विभिन्न अधिकारीलाई जानकारी गराएपनि सरसफाइ भएको छैन । दैविक उद्धार समितिले नगरपालिकाका अधिकारी पवन झालाई सरसफाईको जिम्मेबारी दिएपनि आजसम्म सरसफाई हुन नसकेको चौधरीले बताए ।
शैलेन्द्र साहको उक्त कुखुरा फार्ममा बाढीका कारण करिब एक हजार कुखुरा मरेको छ ।
