जनकपुर अञ्चल अस्पतालको चरम लापरवाहीले १३ वर्षे बालकको मृत्यु

हुलाकी न्युज, जनकपुरधाम । जनकपुर अञ्चल अस्पतालको चरम लापरवाहीको कारण एक बालकको ज्यान गएको छ । मिथिला विहारी गाउँपालिका १० ठेरा बस्ने कैलाश मण्डलका १३ वर्षका छोरा राजा मण्डलको अस्पतालको लापरवाहीले ज्यान गएको हो ।
बालकलाई एक्कासी ज्वरो आएपछि बुधबार विहान ९ बजे जनकपुर अञ्चल अस्पतालमा उपचारको लागि भर्ना गरिएको थियो । त्यसपछि चेकजाँच गरि चिकित्सकहरुले भर्नाको लागि बेड खाली नभएको भन्दै फर्काएका थिए । बालकको स्वास्थ्य अवस्था खराब भएपछि साँझ ६ बजे पुनः जनकपुर अञ्चल अस्पतलकै अकास्मिक कक्षमा भर्ना गराएपछि केहि समय पश्चात वच्चा वार्डको बडेमा पठाएर उपचार शुरु गरिएको बुबा कैलासले बताउनुभयो ।
राति ९ बजे बालकको स्वास्थ्य अवस्था झनै खराब हुन थालेपछि डिउटीमा रहेका नर्स नैनतारा साह र कविता चौधरीलाई बुबा कैलासले पटक पटक छोरालाई हेरदिनुस् भनेर गुहार लगाउँदा उल्टै हप्काएर फर्काएको त्यहाँका प्रत्यक्षदर्शी एक अर्का विरामी कुरुवा जुमेदा खातुनले बताउनुभवायो । उहाँका अनुसार नर्सहरु मोवाईल चलाएर बसेका थिए । वच्चा वार्डमा डिउँटी रहेका डा.बैद्यनाथ ठाकुर डिउटी छाडेर आफ्नो क्वाटरमा आराम गरि राख्नु भएको थिया, नर्सहरुले बताएका छन् ।
बुबा कैलाशका अनुसार राति १२ बजे बालकको अवस्था अत्यन्तै चिन्ताजनक हुँदा डिउटीमा रहेकी नर्स नैनतारासा साह आफैले सुई लेखेर किनरे ल्याउन लगाई सुई लगाउनु भएको थियो । त्यस पश्चात बालकको अवस्था झनै चिन्ताजनक भएको थियो । मोवाईल चलाएर बसेका नर्सहरुलाई बुबा कैलाशले गुहार लगाउँदै ‘मेरो छोरालाई हेरि दिनुस् । नत्र मरि हाल्छन् ’ भन्दा डिउटीमा रहेका नर्सहरुले ‘ कच कच नगर्नु ,मैले तपाईको छोराको ठेक्का लिएको छैन ’ भन्दै जवाफ फर्काएको प्रत्यक्षदर्शीहरुले बताएका छन् । त्यस पश्चात बालकका बुबा कैलाश र आमा सन्तोषिया देवीले छोरालाई उपचारको लागि निजी अस्पतालमा लग्न खोज्नु भएको थियो । तर पुनः छोरालाई त्यहि बेडमा राखेर उपचारको लागि नर्सहरुलाई आमाबुबाले गुहार लगाउनुभएको थियो ।
प्रत्यक्षदर्शीका अनुसार राति तीन बजे बालकको मृत्यु भएपछि आक्रोसमा बुबा कैलासले नर्समाथि लठ्ठी फाल्दा प्रहरीले उहाँलाई समातेर लगेका थिए । छोराको मृत्यु पश्चात विछिप्त भएका बुबा कैलाशलाई प्रहरीले दुई घण्टा नियन्त्रणमा लिएर कुटपीट गरि छाडेका छन् । प्रहरीले समातेर जिल्ला प्रहरीमा लगि गालीगलौज गर्दै झाप्डै झापडले हिर्काएको बुबा कैलाशले दुखेसो पोख्नु भयो । उहाँले रुदै भन्नुभयो ‘ यो कहाँको न्याय हो ? एका तर्फ नर्सको लापरवाहीले मेरो छोरो मरेको छ, अर्को तर्फ प्रहरीले उल्टै मलाई समातेर लगि चोर बदमास र तथानाम गाली गर्दै झाप्डै झापड हिर्कायो । ’
बुबा कैलासले उचित क्षतिपुर्ति र दोषी चिकित्सक र प्रहरीलाई कारबाही लागि पहल गरि दिन सबैपक्षसंग गुहार गर्नुभयो । छोराको मृत्यु पश्चात आमा सन्तोषिया देवी अचेत हुनु भएको छ । घटना पश्चात अस्प्तालमा आएका सर्वसाधारण स्थानीयबासिन्दाहरु अस्पतालमा चिकित्सकको व्यवहार र प्रहरीको ज्यादतीप्रति आक्रोसित भएका छन् ।
यता डिउँटीमा भएका नर्स नैनतारा साहले डिउँटी छाडेर कोठामा आराम गरि रहेका डा.बैद्यनाथ ठाकुरसंग सोधेर बालकलाई सुई लगाएको प्रतिक्रिया दिनुभयो । उहाँले आफुमाथि मृतक बालकका पिता कैलाशले लठी बजारेपछि प्रहरीलाई बोलाएको बताउनुभयो । नर्स साहले बालकको मृत्यु यहाँबाट लगेपछि भएको प्रतिक्रिया दिनुभयो ।
पछिल्लो समय जनकपुर अञ्चल अस्पतालमा चिकित्सकको लापरवाहीले सर्वसाधारण विरामीको ज्यान जाने क्रम बढेको छ । त्यस अस्पतालमा कार्यरत्त चिकित्सकहरु । आफ्नो डिउँटीका समयमा पनि आफ्नो निजी क्लिनिकमा बढी समय दिने गरेको गुनासो पटक पटक सुन्ने गरिन्छ । यहाँसम्मकी जनकपुर अञ्चल अस्पतालका मेसु डा.रामपरिक्षण यादव समेत जनकपुर अञ्चल अस्पतालमा भन्दा आफुले अवैद्य रुपमा सञ्चालन गरेको कृष्णा नर्सिंगहोममा बढी समय दिने गरेको सर्वसाधारणहरुको गुनासो छ । सभार: टुडेपाटी