अमरेश सिंह भन्छन्,‘अहिले प्रतिक्षामा बसेको छु’

हुलाकी न्यूज, काठमाडौं ८ आश्विन । संविधानको मस्यौदामाथि सुझाव संकलनदेखि नै आन्दोलनमा सक्रिय देखिएका नेपाली काँग्रेसका सभासद् अमरेश सिंहको निकै आलोचना हुँदैछ । तर सिंह आफूलाई बचाउ गर्दै आएका छन् ।

संविधान सभाको अन्तिम प्रक्रियासम्म सिंहलगायतका सभासद्हरु विरोधमा देखिएका थिए तर अचानक उनीहरुले हस्ताक्षर गरेपछि मधेश–थरुहटमा उनीहरुप्रति तीब्र आक्रोस बढेको छ ।

हुलाकी न्यूजसँग सिंहले गरेको विशेष कुराकानीमा आफूहरु अहिले पनि विरोध मै रहेको बताउँदै संविधानलाई स्वागत गर्ने वा त्यस्तो कुनै कार्यक्रममा सहभागी नभएको दाबी गरे ।

हुलाकी न्यूजसँग सिंहले भने, ‘म अहिले पनि विरोधमै छु । मेरो आन्दोलन जारी छ । सांकेतिकरुपमा दुई दिन संविधान सभा बहिस्कार गरे । तर पार्टी छोड्ने कुरा मैले गरेको छैन ।’

सिंहले भने, ‘मेरा पार्टीका शीर्ष तीन नेताले माग पुरा गर्ने आश्वासन दिएका छन्, प्रधानमन्त्री सुशील कोइराला, शेरबहादुर देउवा र रामचन्द्र पौडेलले हामी असन्तुष्टहरुसँग बाम्बार छलफल गरेर माग पुरा गर्ने बताए । हाम्रै दबाबका कारण प्रधामन्त्रीले आफ्नो मनत्व्यमा समान जनसंख्याको आधारमा प्रतिनिधित्व र समानुपातिक समावेशी स्वीकार गर्ने बताएका छन् । हामीलाई केपी ओली र प्रचण्डले पनि कमिटमेन्ट गर्नु भएको छ ।’

अहिले पनि आफूहरुले दबाब दिइरहेको बताउँदै सिंहले भने, ‘हामी २० जना सांसदहरु प्रधानमन्त्रीलाई भेटेर त्यो कुराहरु स्मर्न गरायौं । केही कुराहरु लागु पनि भएका छन् । अहिले संसद चलेको छैन, संसद चलेपछि हामी कडारुपमा प्रस्तुत हुनेछौं ।’

आफूहरु पार्टी छोड्ने वा नयाँ पार्टी बनाउने पक्षमा नरहेको भन्दै सिहंले, ‘हाम्रा मागहरु अहिले पुरा नभए पार्टीको महाधिवेशनमा लग्नेछौं । महाधिवेशबाट लागु गर्न दबाब दिनेछौं । पार्टीमाथि निरन्तर दबाब दिदैछौं । हामीले तीन पटक लिखितरुपमा पार्टीमा असहमति जनाइसकेका छौं । म पार्टी मै बसेर संघर्ष गर्छु, तर मधेशको माग छोडेको छैन ।’

मधेशीलाई अधिकार नदिन एउटा पुरा समुदाय नै सक्रिय भएको सिंहले बताए । मधेशी मोर्चाको मागमा अहिले पनि आफ्नो समर्थन रहेको बताउँदै सिंह कम क्षति होस भन्ने पक्षमा रहेको दाबी गरे ।