हुलाकी न्यूज, काठमाडौं २८ पुस । संयुक्त लोकतान्त्रिक मधेशी मोर्चासहितको संघीय गठबन्धनले शनिबार काठमाडौंमा बृहत्त अन्तरक्रिया गर्दैछ । संविधान संशोधनको माग गर्दै आएका मोर्चासहितको गठबन्धनले वर्तमान राजनीतिक परिस्थितिका विषयमा बृहत्त अन्तरक्रिया गर्न लागेको हो ।
काठमाडौंस्थित राष्ट्रिय नाच घरमा शनिबार दिउँसो १ बजे गठबन्धनले अन्तरक्रिया गर्न लागेको हो । बुधबार तीनकुनेस्थित संघीय समाजवादी फोरम नेपालको पार्टी कार्यालयमा बसेको गठबन्धनको बैठकले आन्दोलनको कार्यक्रम बमोजिम अन्तरक्रिया गर्न लागेको जनाएको छ ।
बैठकमा सहभागी तराई मधेश लोकतान्त्रिक पार्टीका उपाध्यक्ष बृषेश चन्द्र लालले हुलाकी न्यूजसँग कुराकानी गर्दै माघ एक गते शनिबार ‘वर्तमान राजनीतिक परिस्थिति संविधान संशोधन÷परिमार्जन’ विषयक बृहत्त अन्तरक्रिया गर्न लागेको बताए ।
अन्तरक्रियामा बुद्धिजिवी तथा राजनीतिक दलका प्रतिनिधिहरु पनि सहभागी हुनेछन् । अन्तरक्रियामा नयाँ शक्ति नेपालका संयोजक डा.बाबुराम भट्टराईलाई विशेष बक्ताका रुपमा बोलाउन लागिएको छ । फोरम नेपालका संयोजक उपेन्द्र यादवको आग्रहमा बाबुरामलाई कार्यक्रममा बोलाउन लागिएको हो ।
अन्तरक्रियाको आयोजना संघीय गठबन्धनले गर्नेछ भने संयोजन नेपाः पार्टीले गर्नेछ ।
