हुलाकी न्यूज, काठमाडौं ४ असोज । विश्वको विभिन्न देशमा रहेका मधेशी–थारु तथा आदिवासी जनजातिहरुले नेपाली संविधानको विरोधमा प्रदर्शन गरेका छन् । नेपालको संविधान मधेश विरोधी तथा विभेदकारी रहेको भन्दै उनीहरुले विरोध गरेका हुन् ।
मुख्य रुपमा अमेरिका, बेलायत, अष्ट्रेलिया, भारत, दुबई र कतारमा नेपालको संविधान दिवसको अवसरमा मधेशी थारु तथा आदिवासी जनजतिहरुले कालो दिवस मनाएका छन् ।
अमेरिकामा डीएफडब्लू मधेशी समाजले महात्मा गान्धी मेमोरियल प्लाजा टेक्स्समा विरोधको कार्यक्रम गरेका छन् । त्यस्तै अमेरिका मै कालो पट्टी बाँधेर प्रदर्शन हुनुका साथै मसाज लुजुस पनि निकालिएको छ । एशोसिशएन अफ नप्लीज् तराईन इन अमेरिकाले पनि संविधानको विरोध गरेको छ ।
यता बेलायतको लण्डनमा रहेका मधेशीहरुले पनि नेपालको संविधान दिवसको अवसरमा कालो दिवस मनाएका छन् । मधेशी समाज यूकेले लण्डनमा रहेको नेपाली दुतावास अगाडि कालो दिवस मनाएको हो । त्यस्तै बेलायतको अन्य क्षेत्रमा पनि प्रदर्शन भएको छ ।
यसैगरी छिमेकी मुलुक भारतको जन्तरमन्तरमा पनि ठूलो संख्यामा प्रदर्शन भएको छ । दिल्लीमा रहेका मधेशीहरुको छाता संगठन युनाईटेड मधेशीको अगुवाईमा कालो दिवस मनाइएको छ । त्यस्तै बैग्लुरमा गैरआवासीय मधेशी संघका सुजित ठाकुरलगायतको अगुवाई नेपालको संविधान जलाइएको छ ।
यसैगरी बैदेशिक रोजगारमा रहेका मधेशीहरुले अष्ट्रेलिया, दुबई, कतारसहितका देशमा छुट्टाछुट्टै प्रदर्शन गरेका छन् । बागंलादेशमा मेडिकल अध्ययन गरिरहेका विद्यार्थीहरुले पनि कालो दिवस मनाएका छन् ।
