फुट्दै फोरम, नयाँ समूहद्वारा राष्ट्रिय भेलाको तयारी (रिपोर्ट)

हुलाकी न्यूज, काठमाडौं २२ माघ । संयुक्त लोकतान्त्रिक मधेशी मोर्चाका एक घटक संघीय समाजवादी फोरम नेपालले संविधानमा समानुपातिक समावेशीको माग राख्दै आन्दोलन गर्दैछ ।

तर उक्त पार्टी नै समानुपातिक समावेशी नभएपछि फुट्को संघारमा पुगेको हो ।

मधेशी जनअधिकार फोरम नेपाल र संघीय समाजवादी पार्टीसहित तीन पार्टी एकीकरण भएर संघीय समाजवादी फोरम नेपाल बनेको हो ।
पार्टी एकीकरणका बखत पार्टीको हरेक तह तथा कार्यहरु समानुपातिक समावेशी हुने उल्लेख गरिएको थियो । तर संशोधनसहितको एकीकृत विधानमा ‘तोके बमोजिमको समानुपातिक समावेशी हुने’ भन्ने उल्लेख गरिएको छ ।

उक्त विषयलाई लिएर गएको साता भएको फोरम नेपालको केन्द्रीय समिति बैठकमा विवाद उत्पन्न भयो । उक्त विवादले उग्ररुप लिदै जाँदा नयाँ विचार समूह बनेको छ ।

उक्त विचार समूहले केन्द्रीय समिति बैठकमा ८ बुँदे माग राखेका छन् । जसमा मधेशमा जारी आन्दोलनमा भएको क्षति र उपलब्धीको मूल्यांकन गर्दै आत्मआलोचना गर्न पार्टी नेतृत्वसँग माँग गरिएको छ ।

संघीय नव विचार समूहको संयोजन गरिरहेका नेता रिजवान अन्सारीका अनुसार उत्पीडित जनताका लागि बनाइएको पार्टी सामन्ति प्रबृतिको हुँदै गएकोले नयाँ विचार समूह बनाउन परेको छ ।

हुलाकी न्यूजसँग कुराकानी गर्दै नेता अन्सारीले पार्टी अध्यक्ष उपेन्द्र यादवमा सामन्ति प्रवृति हावी हुँदै गएको र पार्टी निर्माणका बेला लिइएका संकल्पहरु विर्सिदै गएको बताए ।

अन्सारीले भने,‘नव विचार समूह बनाएर हामीले पार्टी भित्रै संघर्ष गर्नेछौं । यसलाई जिल्ला स्तरसम्म लग्दैछौं । हामी केही दिनमै राष्ट्रिय भेला बोलाएर आगामी विषयमा छलफल गर्नेछौं । पार्टीले हाम्रा मागहरु सम्बोधन नगरेको खण्डामा राष्ट्रिय भेलाबाट एउटा फरक शक्ति बन्नेछ ।’

यता संघीय समाजवादी फोरम नेपालका अध्यक्ष उपेन्द्र यादवले हुलाकी न्यूजसँग कुराकानी गर्दै यस सन्दर्भमा छानविन भइरहेको बताए । उनले पार्टीभित्र केही व्यक्तिहरुको असन्तुष्टिलाई समान्य रुपमा लिएको बताए ।

संघीय नव विचार समूहलाई कारवाही गर्ने सुरसार

हाल पार्टीभित्रै संघीय नव विचार समूह बनाएर संघर्ष गरिरहेका नेताहरुलाई कारवाही गर्ने सुरसार देखिएको छ । विहीबार केन्द्रीय सदस्य तथा पर्सा जिल्लाका इन्चार्ज विरेन्द्र प्रसाद यादवले प्रेस विज्ञप्ति जारी गर्दै नव विचार समूहका सदस्यहरुलाई कारवाही गर्ने चेतावनी दिएका छन् ।

विज्ञप्तिअनुसार फोरम नेपालको अनुसाशन समितिबाट कारवाहीको प्रक्रिया अगाडि बढाइएको बुझिन्छ । नव विचार समूहका सदस्यहरुले नयाँ पार्टी खोल्न लागेको आरोपसमेत लगाइएको छ ।

संघीय नव विचार समूह

नेपाल एक बहुजातीय, बहुराष्ट्रिय, बहुभाषिक, बहुसांंस्कृतिक र बहुधार्मिक मुलुक हो । राज्यले आदिवासी–जनजाति, मधेशी, दलित (शिल्पी), थारू, महिला, मुस्लिम, पिछडावर्ग, खस समुदाय लगायत सवै जातजाति, भाषाभाषी, धर्म संस्कृकिो सम्मान गर्नुको सट्टा उनीहरूहरूमाथि राजनीतिक, आर्थिक, सामाजिक एवम् सांस्कृतिक अन्याय र उत्पीडन गर्दै आइरहेको हो । अग्रगामी परिवर्तनका लागि नयाँ बैकल्पिक राष्ट्रिय शक्तिको आवश्यकता महसुस गरी संघीय समाजवादी पार्टी नेपालको स्थापना भएको थियो । र, यही महान् उद्देश्यसाथ एकीकरण अभियानद्वारा ‘संघीय समाजवादी फोरम नेपाल’ को उदय भएको हो ।
संघीय समाजवादी पार्टीको स्थापनाको पृष्ठभूमि नै उत्पीडन र बहिष्करणमा परेका जाति, समुदाय र राष्ट्रियताहरूको पहिचान र अधिकार स्थापित गराउनु रहेको थियो । यस महान् उद्देश्यका साथ संघीय समाजवादी पार्टीको नामले नयाँ खालको बैकल्पिक राष्ट्रिय शक्ति निर्माणमा जुटेका तत्कालीन समयका संघर्षशील नेताहरू दुईवटा कुरामा केन्द्रित थिए (१) सवै जातजाति, वर्ग, समुदाय र क्षेत्रका मुद्दाहरू समेटिने पार्टीको निर्माण (२) पार्टीको तलदेखि माथिल्लो निकायमा सवै जातजाति, वर्ग, समुदाय र क्षेत्रको समानुपातिक नेतृत्वको प्रत्याभूति । र, यही पृष्ठभूमिमा वर्षाैंदेखिको राजनीतिक लगानी त्यागेर नेताहरूले यो बैकल्पिक राजनीतिक शक्ति ‘संघीय समाजवादी पार्टी’ को निर्माण गरेका थिए ।
संघीय समाजवादी पार्टीले आफ्नो अभियान मुताबिक एकताको बाटोलाई खुला राख्यो । एकता अभियानमुताबिक नै संघीय समाजवादी पार्टी, मेधेशी जनअधिकार फोरम नेपाल र खस राष्ट्रिय समावेशी पार्टीबीच एकीकरण सम्भव भई उपेन्द्र यादवको नेतृत्वमा ‘संघीय समाजवादी फोरम नेपाल’ को नामले एकता हुन गयो ।
एकीकरणको नाममा बिचलनको शुरूआत भयो । समानुपातिक समावेशीताको आधारभूत मूल्य–मान्यता बोेकेको पार्टीले एकीकरण गर्ने समयमा समानुपातिक समावेशीको सिद्धान्त नै छोडिदियो । एकीकरण अभियानमा झन् समावेशीताको मलजल हुनुका सट्टा संगठन नै तहसनहस हुने गरी संरचना बन्यो । पार्टीमा केही नेताहरूको व्यक्तिवादी सोचले पार्टीलाई आफ्नो विचारबाट बिमुख गरायो । एकीकरणको नाममा संघीय समाजवादीको विधानमा रहेको समानुपातिक समावेशीको नीतिलाई अस्वीकृत गरिदियो । केही नेताहरूको स्वार्थी चरित्रले उत्पीडित जनताको समानुपातिक समावेशिताको हकलाई नै कुण्ठित पार्ने षडयन्त्रले हामी सच्चा जनताका सिपाहीहरूलाई मर्माहत तुल्याउनु स्वभाविक बन्यो । पूर्ण समानुपातिक चरित्रको एक मात्र पार्टीको संज्ञा पाउन थालेको पार्टीमा आएको यस बिचलनले जनताले अपेक्षा गरेको समानुपातिक चरित्र भएको नयाँ खालको राष्ट्रिय पार्टीको निर्माण हुन नसक्ने हाम्रो ठहर छ । यसरी कसरी नयाँ खालको बैकल्पिक राजनीतिक शक्तिको निर्माण हुने आशा गर्न सकिन्छ ? हामीले विरोध गर्यौं, फरक मत दर्ज गरायौं तर अन्तरपार्टी लोकतन्त्रको बैधानिक अधिकारलाई प्रयोग गर्न नदिई नेतृत्वले निरंकुश, स्वेच्छाचारी र गैरबैधानिक चरित्र प्रदर्शन गर्यो । यसले लोकतान्त्रिक मूल्य–मान्यतालाई समेत धज्जी उडाउँदै नेतृत्वले नै एउटा अग्रपंक्तिको क्रान्तिकारी शक्ति बन्ने सपना बोेकेको पार्टीलाई परम्परागत तथा यास्थितिवादी पार्टीको रूपमा परिणत गरिदिएको छ ।

आम नेपाली जनता जो हिजो उत्पीडन, दमन र शोषण सहँदै आएका थिए, आज सवै तह र निकायमा समानुपातिक समावेशीता र विशेषाधिकारको माग गरिरहेको बेला क्रान्तिकारी पूर्ण समानुपातिक समावेशी चरित्र भएको नयाँ खालको पार्टी निर्माणको बाटो छोडेर यथास्तिवादी पूरानै खालको एक थान पार्टी बनाउने नेतृत्वको नीयतिले हामीलाई सशंकित पारेको छ । हामी, अग्रगामी नयाँ खालको राजनीतिक शक्तिको निर्माणको पक्षका भएका असन्तुष्ट साथीहरूले पार्टीमा भइरहेको यस दुष्चक्रबारे सचेत गराई नेतृत्वलाई सच्याउने सुझाव दिन चाहन्छौं । यस पाराले पार्टीका केही नेताविशेषको स्वार्थीसिद्धि हुने भएपनि सिंगो पार्टी चाहिँ विसर्जनको स्थितिमा पुग्ने पक्कापक्की छ । यसरी उत्पीडनमा परेका नेपाली जनताको चाहनालाई सम्बोधन नगरेपछि जनता यस पार्टीबाट टाढिंदै जाने निश्चित प्रायः छ ।
दुई हप्ताभित्र निम्न सुधारहरू गर्न हामी नेतृत्वलाई चेतावनी दिन्छौं । यसो नभएको खण्डमा यो विचार समूहले राष्ट्रिय कार्यकर्ता भेला बोलाई आवश्यक कदम चाल्न विवश हुनेछ ।

१. हामी सातजना केन्द्रीय सदस्यहरूले पार्टी विधानले दिएको अधिकार अनुसार पार्टीको दोस्रो केन्द्रिय कमिटीको बैठकमा प्रस्तुत गरेको प्रस्तावमाथि छलफल गरि निर्णय गर्न केन्द्रीय कमिटिको विशेष बैठक अविलम्व बोलाइयोस् ।
२. केन्द्रीय समितिको दोस्रा बैठकले गरेको कार्य विभाजनले कामको जिम्ेवारी सहि र समावेशी ढंगले नभएकोले यसमा हाम्रो असहमति छ । यसलाई अविलम्व सच्याइयोस् ।
३. प्रधानमन्त्रीको निर्वाचनमा दलले भाग लिनु बिलकुल गलत थियो । यसबारे आम जनतासँग नेतृत्वले आत्मालोचना गरोस् ।
४. केन्द्रीय समितिले प्रस्तुत गरेको राजनीतिक प्रतिवेदनमा संविधानसँग सम्बन्धित मुद्दाको बारेमा भएको व्याख्या अपूरो छ । यसमा आदिवासी जनजाति, मधेशी, दलित, खस समुदाय, महिला, मुस्लिम, पिछडा वर्गको विभिन्न हक र शिवेषाधिकारहरूलाई छोडेको छ । संविधान संशोधनले मात्र यी उत्पीडितहरूको माग पूरा हुन सक्दैन । पार्टीले प्रस्तुत गरेको ‘नयाँ संविधानका प्रतिगामी तथा यथास्थितिवादी धाराहरू’ को ३६ बुंदे व्याख्याअनुसार संविधानको सशोधन मात्र गरेर पुग्दैन । यसको पूनरलेखनकै आवश्यकता छ । प्रतिवेदनको यो धारा सच्याइयोस् । र, संविधान पुनरलेखनलाई प्रमुख मुद्दा बनाइयोस् ।
५. वर्तमान व्यवस्थापिका संसद प्रतिक्रान्तिको साधन भएको स्वयं राजनीतिक प्रतिवेदनमा उल्लेख भएको छ । त्यसकारण यसले जनताको अधिकार स्थापित गर्न सक्दैन । त्यसैले पार्टीले आफ्नो सांसदहरूलाई फिर्ता बोलाई उनीहरूलाई आन्दोलनमा परिचालित गर्नुपर्छ ।
६. मधेसी जनताको जारी वलिदानीपूर्ण र साहसी आन्दोलनलाई ठीक ढंगले व्यवस्थापन र नेतृत्व दिन नसकेको जसका कारण वलिदान बढी र उपलब्धी न्यून प्राप्त भएको छ । आन्दोलनरत सबै पक्षलाई संगठीत गर्न नचाहनु यसको एउटा प्रमुख कारण हो । यसकारणले अविलम्ब आन्दोलनरत सबै पक्ष र संगठनहरूलाई संगठीत गरि महा गठबन्धनको निर्माण गरियोस् ।
संघीय नव विचार समूह ः
आजको भेलाले केन्द्रीय स्तरमा निम्नानुसारको समन्वय समिति गठन गरेको छ ।
रिजवान अन्सारी (सर्लाही) – संयोजक
वीरबहादुर लामा (मकवानपुर) – सदस्य
नोरशाङ शेर्पा (दोलखा) – सदस्य
राजकुमार यादव (पर्सा) – सदस्य
रामेश्वरप्रसाद यादव (रौतहट) – सदस्य
बाबुराम भुषाल (बर्दिया) – सदस्य
विश्वदीप लिङ्देल (झापा) – सदस्य
नवीन्द्रकुमार योञ्जन (सिन्धुपाल्चोक) – सदस्य
देवेन्द्र राई (इलाम) – सदस्य
मेम्बर लो (मकवानपुर) – सदस्य
शम्भु चौधरी (बारा) – सदस्य
उपेन्द्र साह (महोत्तरी) – सदस्य
रामेन्द्र साह (सर्लाही) – सदस्य
कलामुद्दीन मदनी (बारा) – सदस्य
रिजवान अन्सारी
संयोजक

मिति ः २०७२÷१०÷१९